УЛААНБААТАР ХОТЫН ҮЕРИЙН ЭРСДЭЛИЙГ БУУРУУЛАХ ТӨСӨЛД ДЭЛХИЙН БАНКТАЙ ХАМТРАН АЖИЛЛАЖ БАЙНА.

 

Нийслэлийн Засаг дарга бөгөөд Улаанбаатар хотын Захирагч Х.Нямбаатар, “Нийслэлийн өмчит Улаанбаатар хөрөнгө оруулалт, менежмент ҮЦК” ХХК-ийн Гүйцэтгэх захирал Г.Гангамөрөн нар Дэлхийн банкны Монгол дахь суурин төлөөлөгч Таэхюн Ли тэргүүтэй төлөөлөгчдийг хүлээн авч уулзан, хамтын ажиллагааны хүрээнд хэрэгжиж буй төслүүдийн явц, цаашдын төлөвлөгөөг хэлэлцлээ.

Уулзалтаар Улаанбаатар хотын үер, усны эрсдэлийг бууруулах төслийг онцлон хэлэлцэв. Төслийн хүрээнд:

17 байршилд 102 км үерийн хамгаалалтын далан, суваг байгуулах,

Инженерийн дэд бүтцийн хамгаалалтын ажлуудыг өргөтгөх,

50 км бохир усны шугам, худаг доторлогооны ажлыг хэрэгжүүлэх талаар хэлэлцсэн ба судалгаагаар:

-560 мянга орчим иргэн үерийн эрсдэлд өртөх магадлалтай,

-1.2 их наяд төгрөгийн хохирол үүсэх эрсдэлтэй гэсэн дүгнэлт гарчээ.

Иймд төслийг эрчимжүүлэх шаардлагатайг онцолж, зураг төсөл, ТЭЗҮ, байгаль орчин, нийгмийн үнэлгээнд үзүүлсэн буцалтгүй тусламжид талархал илэрхийллээ.

Мөн үерийн эрсдэлийг бууруулах чиглэлээр олон улсын семинарыг 2026 оны 4 дүгээр сард зохион байгуулахаар төлөвлөж байна.

Төслийн хэрэгжилт одоогоор ~15%-тай байгаа бөгөөд цаашид хэрэгжилтийг хурдасгах шаардлагатай байгааг талууд онцоллоо.

Хотын удирдлагын зүгээс төслүүдийн хэрэгжилтийг эрчимжүүлж, бодит үр дүнд хүргэхэд онцгой анхаарч ажиллахаа илэрхийллээ.

"Нийслэлийн өмчит Улаанбаатар хөрөнгө оруулалт, менежмент ҮЦК" ХХК нь Олон Улсын байгууллагуудтай хамтран Нийслэлийн дэд бүтэц, инженерийн шийдэл, тогтвортой хөгжлийг дэмжсэн төслүүдийг хэрэгжүүлэхэд идэвхтэй оролцож байна.