“НИЙСЛЭЛ БОНД”-ЫН АРИЛЖАА АМЖИЛТТАЙ ХААГДАЖ, ДЦС-5 ТӨСЛИЙН САНХҮҮЖИЛТИЙН ДАРААГИЙН ШАТ ЭХЭЛЛЭЭ.

Нийслэлийн дотоодын үнэт цаасны зах зээлд гаргасан “Нийслэл бонд”-ын арилжаа амжилттай хаагдаж, Улаанбаатар хотын стратегийн ач холбогдол бүхий “Дулааны V цахилгаан станц” төслийн санхүүжилтийг зах зээлийн эх үүсвэрээр шийдвэрлэх бодит боломжийг улам бататгасан чухал үйл явдал боллоо.

Энэхүү арилжаа нь зөвхөн нэг төслийн санхүүжилтээр хязгаарлагдахгүй, Нийслэлийн томоохон дэд бүтэц, мега төслүүдийг дотоодын хөрөнгийн зах зээлээр дамжуулан санхүүжүүлэх боломж бодитоор бүрдэж байгааг харуулснаараа онцлог юм.

Арилжааны үр дүнд “Дулааны V цахилгаан станц” төслийн санхүүжилтийн суурь нөхцөл бэхжиж, цаашид:
өсөн нэмэгдэж буй эрчим хүчний хэрэгцээг хангах,
100 мянган айлыг эрчим хүчээр, 40-50 мянган айлыг дулаанаар хангах хүчин чадал бүхий эх үүсвэрийг бүрдүүлэх,
стратегийн төслүүдийг санхүүгийн олон тулгуурт бүтэцтэйгээр хэрэгжүүлэх боломж улам тодорхой болж байна.

“Нийслэлийн өмчит Улаанбаатар хөрөнгө оруулалт, менежмент ҮЦК” ХХК нь “Нийслэл бонд”-оор төвлөрүүлсэн эх үүсвэрийг “Нийслэлийн хөгжлийн сан”-аар дамжуулан “Дулааны V цахилгаан станц” төслийн санхүүжилт, хөрөнгө оруулалтын шийдлийг боловсруулж, нэгж эрх эзэмшигчдийн хурлыг зохион байгуулан, холбогдох шийдвэрийг батлуулах ажлыг мэргэжлийн түвшинд хэрэгжүүлэн ажиллалаа.