НИЙСЛЭЛИЙН 51,080 ӨРХИЙГ ШИНГЭРҮҮЛСЭН ХИЙН ХАЛААЛТАД ҮЕ ШАТТАЙГААР ШИЛЖҮҮЛНЭ.

 

Нийслэлийн агаарын чанарыг сайжруулах, гэр хорооллын өрхүүдийн дулааны шийдлийг шинэ шатанд гаргах зорилтын хүрээнд 2026 онд “Агаарын чанарыг сайжруулах ногоон бүс”-д хамаарах таван дүүргийн 35 хорооны нийт 51,080 өрхийг шингэрүүлсэн нефтийн хийн халаалтад үе шаттайгаар шилжүүлэхээр ажиллаж байна.

Тодруулбал, төлөвлөлтөд:

Сонгинохайрхан дүүргийн 6, 8, 9, 11, 23, 28, 30, 31, 39, 43 дугаар хорооны 14,685 өрх

Чингэлтэй дүүргийн 7, 8, 9, 10, 11, 12, 13, 14, 20, 21 дүгээр хорооны 12,229 өрх

Баянгол дүүргийн 7, 9, 10, 11, 16, 21, 22, 23 дугаар хорооны 8,483 өрх

Баянзүрх дүүргийн 2, 21, 27, 29, 30, 31 дүгээр хорооны 13,655 өрх

Сүхбаатар дүүргийн 2, 12, 13 дугаар хорооны 2,028 өрх хамрагдаж байна.

Төлөвлөлтөд хамрагдсан өрхүүд сууцныхаа дулаалгыг бүрэн шийдвэрлэсэн тохиолдолд шингэрүүлсэн хийн халаалтын зуухыг нэг удаа үнэ төлбөргүй суурилуулах боломж бүрдэх юм.

Энэхүү ажил нь Нийслэлийн агаарын бохирдлыг бууруулах, айл өрхийн амьдрах орчны чанарыг сайжруулах, эрүүл аюулгүй, илүү үр ашигтай дулааны хэрэглээг дэмжих бодлогын чухал хэсэг болж байна.

“Нийслэлийн өмчит Улаанбаатар хөрөнгө оруулалт, менежмент ҮЦК” ХХК нь "Нийслэлийн ногоон сан"-ийн үйл ажиллагаатай уялдуулан нийгэм, байгаль орчинд эерэг нөлөө бүхий төслүүдийг тогтвортой санхүүжилт, хөрөнгө оруулалтын оновчтой шийдэлтэй уялдуулах замаар нийслэлийн хөгжлийн зорилтуудыг дэмжин ажиллаж байна.