НҮБ-ТАЙ ХАМТЫН АЖИЛЛАГААГ ӨРГӨЖҮҮЛЭХ ЧИГЛЭЛЭЭР САНАЛ СОЛИЛЦЛОО.

 

Нийслэлийн Засаг дарга бөгөөд Улаанбаатар хотын Захирагч Х.Нямбаатар НҮБ-ын Монгол Улс дахь Суурин зохицуулагч Яап Ван Хиердэнтэй уулзаж, хамтын ажиллагааны явц болон цаашдын боломжийн талаар санал солилцов.

Уулзалтын үеэр Х.Нямбаатар НҮБ-ын төрөлжсөн байгууллагуудтай хамтын ажиллагаа идэвхтэй өргөжиж байгааг онцолж, НҮБ-ын Хүүхдийн сангийн “ЧИП” төслийн хүрээнд 1385 өрхийг хамруулсан, мөн НҮБ-ын Хөгжлийн хөтөлбөр болон “Нийслэлийн өмчит Улаанбаатар хөрөнгө оруулалт, менежмент ҮЦК” ХХК-тай хамтран гэр хороололд сэргээгдэх эрчим хүчийг дэмжих, иргэдийн амьжиргааг сайжруулах төслийг хэрэгжүүлж буйг тэмдэглэлээ.

Түүнчлэн Нийслэлийн Засаг даргын Тамгын газар НҮБ-ын Хүүхдийн сантай хамтран HPV болон хеликобактерийн халдвараас урьдчилан сэргийлэх чиглэлээр ажиллаж байгааг дурдаж, цаашид байгаль орчны хамгаалал, тогтвортой хөгжлийн чиглэлээр хамтын ажиллагааг өргөжүүлэх сонирхлоо илэрхийллээ.

НҮБ-ын Монгол дахь Суурин зохицуулагч Яап Ван Хиердэн байгаль орчны тогтвортой байдлыг хангах чиглэлээр Нийслэлтэй цаашид хамтран ажиллахад бэлэн байгаагаа илэрхийлэв.

"Нийслэлийн өмчит Улаанбаатар хөрөнгө оруулалт, менежмент ҮЦК” ХХК нь олон улсын байгууллагуудтай хамтын ажиллагааг дэмжиж, Нийслэлийн тогтвортой хөгжил, ногоон шилжилтийн чиглэлээр хэрэгжиж буй төсөл, хөтөлбөрүүдийн уялдааг ханган ажиллаж байна.