ГАРААНЫ БОЛОН ЖИЖИГ, ДУНД БИЗНЕС ЭРХЛЭГЧДИЙГ ДЭМЖИХ ХӨТӨЛБӨРИЙН НЭЭЛТИЙН ҮЙЛ АЖИЛЛАГАА БОЛЛОО.

 

Нийслэлийн гарааны болон жижиг, дунд бизнес эрхлэгчдийг хөрөнгө оруулалтаар дэмжих хөтөлбөрийн сонгогдсон байгууллагуудад зориулсан сургалт, зөвлөгөөний нээлтийн үйл ажиллагаа 2026 оны 05 дугаар сарын 19-ний өдөр Монголын Үндэсний номын санд зохион байгуулагдлаа.

Нээлтийн үйл ажиллагаанд “Нийслэлийн өмчит Улаанбаатар хөрөнгө оруулалт, менежмент ҮЦК” ХХК-ийн Сангийн удирдлага, эх үүсвэрийн газрын дарга М.Мөнхжаргал, Эдийн засгийн олон талт өсөлтийг дэмжих төсөл /ICED/-ийн захирал, GIZ-ийн төлөөлөл А.Амгалан, Нийслэлийн Бизнес, инновацын газрын дарга Ж.Төгөлдөр нар оролцож, хөтөлбөрийн зорилго, ач холбогдлыг танилцууллаа.

Мөн Нийслэлийн Гарааны бизнесийг дэмжих сангийн Сангийн менежер Т.Баянмөнх хөтөлбөрийн танилцуулга хийж, сонгогдсон бизнес эрхлэгчдэд хөрөнгө оруулалт татах бэлтгэл, бизнесийн өсөлт, санхүүжилтийн боломжийг нэмэгдүүлэх чиглэлээр мэдээлэл өглөө.

Тус хөтөлбөрийг “Нийслэлийн өмчит Улаанбаатар хөрөнгө оруулалт, менежмент ҮЦК” ХХК, Нийслэлийн Бизнес, инновацын газар, Германы Олон Улсын Хамтын Ажиллагааны Нийгэмлэг /GIZ/ хамтран хэрэгжүүлж байгаа бөгөөд гарааны болон жижиг, дунд бизнес эрхлэгчдийг хөрөнгө оруулалт татах түвшинд бэлтгэх, зах зээлд өрсөлдөх чадварыг нэмэгдүүлэхэд чиглэж байна.