БНХАУ-ЫН ХӨРӨНГӨ ОРУУЛАГЧИДТАЙ ТӨСЛИЙН ТАЛБАЙ ДЭЭР АЖИЛЛАЖ, ХАМТЫН АЖИЛЛАГААГ ДАРААГИЙН ШАТАНД АХИУЛЛАА.

 

"Нийслэлийн өмчит Улаанбаатар хөрөнгө оруулалт, менежмент ҮЦК” ХХК нь БНХАУ-ын “Anhui Hualais Food Group” компанийн төлөөлөл болон хөрөнгө оруулагчидтай өмнө эхлүүлсэн хамтын ажиллагааны хүрээнд Монгол Улсад хэрэгжиж буй болон цаашид санхүүжилт шаардлагатай томоохон төсөл, байршлуудтай газар дээр нь танилцууллаа.

Энэ хүрээнд хөрөнгө оруулагчдын төлөөлөл Хүннү хот, Бөөрөлжүүт цахилгаан станц болон “Монголын төмөр зам” ХК-ийн хэрэгжүүлж буй төслүүдийн байршилд ажиллаж, төслийн цар хүрээ, дэд бүтцийн нөхцөл, хэрэгжилтийн явц, цаашдын санхүүжилтийн хэрэгцээтэй танилцав.

Төслийн талбай дээрх танилцуулгын үеэр талууд хот байгуулалт, эрчим хүч, тээвэр логистик, дэд бүтцийн чиглэлийн төслүүдийг хөрөнгө оруулалтын өгөөж, санхүүжилтийн бүтэц, хэрэгжилтийн дараалал болон хамтын ажиллагааны боломжтой уялдуулан нарийвчлан хэлэлцлээ.

БНХАУ-ын хөрөнгө оруулагчдын зүгээс Монгол Улсад хэрэгжиж буй хөгжлийн томоохон төслүүдэд хөрөнгө оруулалт, санхүүжилтийн чиглэлээр хамтран ажиллах сонирхлоо дахин илэрхийлж, боломжит төслүүдийн мэдээллийг гүнзгийрүүлэн судлахаар боллоо.

Цаашид талууд төслүүдийн санхүүжилтийн нөхцөл, хамтын ажиллагааны хэлбэр, хэрэгжилтийн дараагийн алхмуудыг тодорхойлох чиглэлээр ажил хэрэгч түвшинд үргэлжлүүлэн хамтран ажиллахаар санал нэгдэв.