“НОГООН ӨРТӨӨ” ТӨСЛИЙН 32 ДАХЬ ЦЭНЭГЛЭХ СТАНЦ АШИГЛАЛТАД ОРЛОО.
Монгол Улсын Засгийн газрын “Чөлөөлье” үндэсний санаачилгын хүрээнд хэрэгжүүлж буй “Ногоон өртөө” төслийн 32 дахь бүтээн байгуулалт болох “Nexus EV Station-Тасган” цахилгаан автомашин цэнэглэх станц Чингэлтэй дүүргийн Тасганы овоонд ашиглалтад орлоо.
Тус станц нь 6,650 ам метр талбайд, LEED Gold ногоон барилгын шаардлагад нийцүүлэн байгуулагдсан бөгөөд 410 кВт-ын нарны цахилгаан үүсгүүр, 430 кВт.цагийн батарей хуримтлуур, 720 кВт-ын нийт хүчин чадал бүхий дөрвөн цэнэглэх хошуутай. Нэг автомашиныг 15–45 минутад цэнэглэх боломжтой.
“Ногоон өртөө” төслийн хүрээнд улсын хэмжээнд 150 км тутамд цэнэглэх өртөө байгуулж, 500 түргэн цэнэглэх цэг бүхий сүлжээ бий болгохоор ажиллаж байна.
”Нийслэлийн өмчит Улаанбаатар Хөрөнгө Оруулалт, Менежмент ҮЦК” ХХК нь Нийслэлийн ногоон шилжилт, цэвэр эрчим хүч, цахилгаан тээврийн дэд бүтцийн төслүүдийг хөрөнгө оруулалт, санхүүжилтийн боломжтой уялдуулах чиглэлээр ажиллаж байна. Цэнэглэх дэд бүтцийн өргөжилт нь сэргээгдэх эрчим хүч, хуримтлуурын систем, хувийн хөрөнгө оруулалтыг нэгтгэсэн хотын шинэ төрлийн дэд бүтцийн хөрөнгө оруулалтын чиглэл болж байна.
