ТӨРИЙН ҮЙЛЧИЛГЭЭНИЙ СЭТГЭЛ ХАНАМЖИЙН СУДАЛГААНЫ ҮР ДҮНГ ХЭЛЭЛЦЛЭЭ.

 

Засгийн газрын Хяналт хэрэгжүүлэх газар болон Нийслэлийн Засаг даргын Тамгын газар хамтран баталсан төлөвлөгөөний хүрээнд “Төрийн үйлчилгээний сэтгэл ханамж, тулгарч буй хүндрэл” сэдэвт хэлэлцүүлгийг зохион байгууллаа.

Хэлэлцүүлгээр Нийслэлийн төрийн байгууллагуудын иргэдэд үзүүлж буй үйлчилгээний хүртээмж, чанарт хийсэн судалгааны үр дүнг танилцуулсан юм. Судалгаанд НЗДТГ болон харьяа 20 агентлагийн 2304 албан хаагч, үйлчилгээ авсан 1489 иргэн, хуулийн этгээд хамрагдаж, нийт 77,794 өргөдөл, гомдлын мэдээлэлд дүн шинжилгээ хийжээ.

Судалгааны дүнгээс харахад өргөдөл, гомдлын 94–98 хувь нь хуулийн хугацаанд шийдвэрлэгдэж байгаа ч иргэдийн сэтгэл ханамж 40 орчим хувь буюу хангалтгүй түвшинд байгааг онцоллоо. Ялангуяа газар, орон сууц, нийтийн аж ахуйн асуудалтай холбоотой гомдол давамгай байв.

Мөн тус судалгаанд “Нийслэлийн өмчит Улаанбаатар хөрөнгө оруулалт, менежмент ҮЦК” ХХК-ийн албан хаагчид идэвхтэй оролцож, төрийн үйлчилгээний чанар, хүртээмжийг сайжруулах чиглэлээр санал, дүгнэлтээ илэрхийллээ.

Иймд төрийн үйлчилгээний процессыг илүү ойлгомжтой болгох, шаардлагатай мэдээллийг ил тод, хүртээмжтэй байршуулах, мөн өргөдөл, гомдлын шийдвэрлэлтийн чанар, шуурхай байдлыг сайжруулах чиглэлээр арга хэмжээ авч ажиллахаар боллоо.

Хэлэлцүүлгийн төгсгөлд Нийслэлийн захиргааны байгууллагуудад хугацаатай үүрэг, даалгавар өгч, хэрэгжилтийн үр дүнг дахин сэтгэл ханамжийн судалгаагаар үнэлэх юм.