"ДУЛААНЫ V ЦАХИЛГААН СТАНЦ” ТӨСЛИЙН БЭЛТГЭЛ АЖИЛ УРАГШИЛЖ БАЙНА.

 

Улаанбаатар хотын өсөн нэмэгдэж буй эрчим хүчний хэрэглээг тэнцвэржүүлэх, хотын дэд бүтцийн найдвартай байдлыг нэмэгдүүлэх зорилгоор хэрэгжүүлж буй “Дулааны V цахилгаан станц” төслийн бэлтгэл ажил эрчимтэй үргэлжилж байна.

Өнөөдрийн байдлаар төслийн талбайд геодезийн судалгааны 142 цооногийн өрөмдлөгийн ажил бүрэн дууссан бөгөөд 2026 оны дөрөвдүгээр сард барилга угсралтын суурийн ажлыг эхлүүлэхээр бэлтгэл хангаж байна.

Тус станцыг Баянгол дүүргийн 20 дугаар хорооны нутаг дэвсгэрт, ДЦС-2-ын үнсэн сангийн талбайд барихаар төлөвлөсөн бөгөөд төслийн гүйцэтгэгчээр “Митайм Интернэйшнл” компани шалгарч, төр, хувийн хэвшлийн түншлэлийн хүрээнд хэрэгжүүлж байна.

Станцад CFB технологитой зуух, NOx, SO₂ ялгарлыг бууруулах утааны хийн хяналтын систем, агаарын хөргөлттэй конденсатор, усны дахин ашиглалтын шийдэл зэрэг байгальд ээлтэй технологи нэвтрүүлэхээр төлөвлөсөн.

Уг төслийн санхүүжилтийн бүтэц, хөрөнгө оруулалтын эх үүсвэрийг Нийслэлийн хөрөнгө оруулалтын сангаар дамжуулан бүрдүүлж, удирдан зохион байгуулах чиглэлээр “Нийслэлийн өмчит Улаанбаатар хөрөнгө оруулалт, менежмент ҮЦК” ХХК ажиллаж байна.

Төсөл хэрэгжсэнээр Улаанбаатар хотын баруун болон баруун хойд бүсийн орон сууцжилт, хот байгуулалтын хөгжлийг дэмжих цахилгаан, дулааны томоохон эх үүсвэр бүрдэх юм.